Ёс зүйн дэд хорооны 498 гишүүнийг чадавхжуулах сургалт зохион байгуулав

Гэр бүл, хөдөлмөр, нийгмийн хамгааллын яам Монгол Улсын Ёс зүйн хороотой хамтран салбарын 112 байгууллагын ёс зүйн дэд хорооны 498 гишүүнийг чадавхжуулах сургалт зохион байгууллаа.

Сургалтад Төрийн албаны зөвлөлийн гишүүн Монгол Улсын Ёс зүйн хорооны дарга Ц.Амартөгс, Удирдлагын Академийн Эрх зүйн тэнхимийн багш, дэд профессор А.Алтанзул нар Төрийн албан хаагчийн ёс зүйн тухай хууль, Ёс зүйн дэд хорооны ажиллах журам, холбогдох бусад хууль тогтоомжийн талаар мэдлэг, мэдээлэл олголоо.

Ёс зүйн дэд хорооны гишүүдийг чадавхжуулснаар ёс зүйн зөрчлийн шалтгаан, нөхцөлийг судлан эрсдэлийг бууруулах, сургалт, нөлөөллийн ажлыг идэвхжүүлэх, ёс зүйтэй ажиллах орчин, нөхцөлийг бүрдүүлэх, ёс зүйн асуудлыг шийдвэрлэх, урьдчилан сэргийлэх, соён гэгээрүүлэх, хянан шалгах, хариуцлага хүлээлгэх үйл ажиллагаа сайжирна.

Гэр бүл, хөдөлмөр, нийгмийн хамгааллын салбарын байгууллагууд ёс зүй сахилга хариуцлагаар үлгэрлэж, төрд итгэх олон нийтийн итгэлийг нэмэгдүүлэхийг зорьж байна.