Хөгжлийн бэрхшээлтэй уран бүтээлчдийн "хайрын өнгө" үзэсгэлэн олон нийтийн хүртээл болно

Урлаг, соёлоор дамжуулж хөгжлийн бэрхшээлтэй хүний нийгмийн оролцоонд тэгш хамруулах зорилгоор хөгжлийн бэрхшээлтэй уран бүтээлчдийн "ХАЙРЫН ӨНГӨ" уран бүтээлийн үзэсгэлэн 04 дүгээр сарын 03-05-ний өдрүүдэд Монголын театрын музейд гарахаар болжээ.

Дэлхийн хүмүүнлэгийн үйлстэн, нэрт уран бүтээлч Төгс Гэгээрсэн Их Багш Чин Хайн нь эх дэлхийд баяр хөөр, аз жаргал, амар амгалан, эв нэгдлийг авчирч, амьдралыг гэрэлтүүлж, сэтгэлийг тайтгаруулдаг бүхий л салбарын уран бүтээлчдэд хайр хүндэтгэл, талархлаа илэрхийлж, бахархан алдаршуулах зорилгоор жил бүрийн 04 дүгээр сарын 03-ний өдрийг “Олон улсын уран бүтээлчдийн өдөр” болгон тэмдэглэх санаачилгыг 8 жилийн өмнө гарган тэмдэглэж ирсэн билээ. 

Энэ жилийн үзэсгэлэнд уран бүтээлээрээ олноо танигдсан уран сийлбэрч СТА Б.Гонгор, зураач Б.Хувьт болон Ражив Гандийн нэрэмжит Үйлдвэрлэл, урлалын политехникийн коллеж, “Анима” дүрслэх урлагийн коллеж, Сэргээн засах сургалт, үйлдвэрлэлийн төв, “Энэрэл" мэргэжил, боловсролын сургуулийн  суралцагчид, төгсөгчид,  хөгжлийн бэрхшээлтэй уран бүтээлчдийн бүтээлийн дээжээс бүрдэж байгаа нь онцлог.

Үзэсгэлэнд тавигдсан бүтээлүүдийг худалдан авах боломжийг олгох ба нэг уран бүтээлчийн бүтээлийг онцлон дуудлага худалдаагаар худалдана.