Амгалан МСҮТ нь 2012 онд байгуулагдсан бөгөөд хүмүүжигчдийг нийгэмшүүлэх ажлын хүрээнд мэргэжлийн боловсрол, сургалтаар дамжуулан ур чадвар олгож, ажлын байраар хангах, гэмт хэргийн улмаас иргэн, хуулийн этгээдэд учруулсан хохирлыг нөхөн төлөх боломжийг бүрдүүлэх, эзэмшсэн мэргэжил, ур чадвараараа хөдөлмөрийн зах зээлд өрсөлдөхүйц ажилтан бэлтгэх зорилготой. Өнөөдрийн байдлаар барилга, оёдолчин, тогооч зэрэг 10 гаруй мэргэжлээр сургалтын үйл ажиллагаа эрхэлж байна.

Хөдөлмөр, нийгмийн хамгааллын сайд А.Ариунзаяа Амгалан МСҮТ-ийн сургалтын үйл ажиллагааг дэмжих зорилгоор номын санг баяжуулах, шаардлагатай зөөврийн компьютер нийлүүлэх, багш нарыг чадавхжуулах, зөөлөн ур чадварын агуулгыг боловсронгуй болгох чиглэлээр дэмжиж, хамтран ажиллахаа илэрхийллээ. Мөн энэ үеэр ШШГЕГ-ын дарга, хурандаа Д.Загджав, МСҮТ-ийн захирал, хошууч Х.Батбаяр, 409 дүгээр хаалттай хорих ангийн дарга, хурандаа С.Батсайхан нар байгууллагын үйл ажиллагааны талаар танилцуулав.

Халамжаас хөдөлмөрт шилжих бодлогын хүрээнд тус МСҮТ-ийн бараа, бүтээгдэхүүн үйлдвэрлэх, зах зээлд нийлүүлэх, борлуулах боломжийг нэмэгдүүлэх болон хувь хүний хөгжил, нийгмийн халамж, тэтгэмж зэрэг асуудлаар харилцан санал солилцов.