Уг хөтөлбөрийг Монгол Улсын Хөдөлмөр, нийгмийн хамгааллын яам болон Бүгд Найрамдах Солонгос Улсын Жендэрийн тэгш байдал, гэр бүлийн яам хооронд байгуулсан Харилцан ойлголцлын санамж бичгийн хүрээнд 2001 оноос хойш зохион байгуулж байгаа бөгөөд нийт солонгос, монгол 400 гаруй оролцогчдыг хамруулаад байна. Хөтөлбөрт нийгмийн идэвхтэй, өөртөө итгэлтэй, өөрийгөө илэрхийлэх, багаар ажиллах чадвартай залуучуудыг сонгон шалгаруулж авдаг бөгөөд энэ жил дараах найман шилдэг оролцогчдыг монголын талаас хамруулсан. Үүнд: Н.Лхагвабаяр, Л.Мөнх-Очир, Б.Цэнгэлмаа, Д.Ринчендорж, Г.Өнөрбаяр, Ч.Сонинбаяр, Л.Билгүүндалай, Ч.Амаржаргал нар болно.

Энэ удаагийн солилцооны хөтөлбөрийн ерөнхий сэдэв нь “Ковид цар тахлын дараах амьдрал болон Ирээдүйн ажил мэргэжил” байсан. Оролцогчид ерөнхий сэдвийн хүрээнд хоёр орны түүх, соёл, ахуй, ёс заншил, боловсрол, байгаль, нийгэм, эдийн засаг, улс төр, бүтээн байгуулалт хөгжлийн олон талын асуудлаар хэлэлцүүлэг өрнүүлж, санал бодлоо солилцож, монгол-солонгос залуучууд холимог багт хуваагдан хоёр долоо хоногийн турш цахимаар холбогдон ерөнхий сэдвийн хүрээнд илтгэл, багийн ажлыг амжилттай гүйцэтгэлээ. Цаашлаад, монгол, солонгосын залуучуудын төлөөлөл болсон оролцогчид маань найзалж, нөхөрлөх боломжийг нээж өгсөн чухал ач холбогдолтой арга хэмжээ боллоо.

Хөдөлмөр, нийгмийн хамгааллын сайд А.Ариунзаяа хаалтын арга хэмжээний үеэр оролцогчдод талархлын батламж, гарын бэлгээ гардуулж, залуусыг санаачлагч, бүтээлч, манлайлагч байж, улс орныхоо хөгжил, дэвшилд илүү их хувь нэмэр оруулна гэдэгт итгэж байгаагаа илэрхийлж, цаашдын сурлага, хөдөлмөрт нь амжилт хүслээ.