Уг төслийн зорилго нь цар тахлын үед зорилтот бүлгийн иргэд, тэр дундаа хүүхэд, эмэгтэйчүүдэд чиглэсэн нийгмийн халамжийн үйлчилгээг үзүүлэхэд оршиж байна. Тухайлбал, манай яамнаас тодорхойлсон халамжаас хөдөлмөрт шилжих бодлод нийцүүлэн зорилтот бүлгийн 1,520 өрхийн хөдөлмөрийн насны гишүүдийг хамруулах юм. Энэ хүрээнд тэдгээр иргэдийн эрэлт хэрэгцээ, боломжид дүн шинжилгээ хийж, сургалтанд хамруулж чадавхжуулах, бие даан амьжиргаагаа дээшлүүлэхэд нь зориулж ажлын багаж хэрэгслээр хангаж, үйл ажиллагаа эрхлэх, улмаар тэднийг ядуурлаас гарахад нь дэмжлэг үзүүлэх юм.

Энэхүү төслийг нийслэлийн Сонгинохайрхан, Баянзүрх, Чингэлтэй дүүрэгт туршилтын журмаар хэрэгжүүлэх ба зорилтот бүлгийн иргэдийн ядуурлаас гаргах зорилго бүхий “Төгсөлтийн аргачлал”-д тулгуурлан төрийн бус байгууллагын оролцоотойгоор 2 жилийн хугацаанд хэрэгжүүлэх талаар Төслийн зохицуулагч Ц.Болормаа танилцуулав. Төслийг ХНХЯ, ХХҮЕГ, хэлтсүүд, Нийслэлийн болон дүүргүүдийн ЗДТГ, Төсөл хэрэгжүүлэх нэгж хамтран хэрэгжүүлнэ.

Түүнчлэн, уг төслийн хүрээнд өрхийн мэдээллийн нэдсэн сангийн мэдээллийг шинэчлэх, нийгмийн халамжийн цахимжуулалтыг үргэлжлүүлнэ.

Хөдөлмөр, нийгмийн хамгааллын яамны Төрийн нарийн бичгийн дарга Г.Өнөрбаяраар ахлуулсан Төслийн Удирдах Хороо нь уг төслийн ерөнхий төлөвлөгөөнд үндэслэн 2021 оны Үйл ажиллагааны төлөвлөгөөг хэлэлэцэж батлав.