Ахмад настны нийгмийн хамгаалал,хууль тогтоомжийн хэрэгжилтийн талаар ахмадууддаа мэдээлэл өглөө

Монголын ахмадын холбоо болон аймаг, нийслэл, дүүргийн ахмадын хороодын удирдлагуудыг манай яам 2026 оны 09 дүгээр сарын 24-ны өдөр хүлээн авч, Ахмадын байгууллагын түүхт 95 жилийн ойн баярын мэнд хүргэн, Засгийн газраас ахмад настны талаар хэрэгжүүлж байгаа бодлого, арга хэмжээний талаар мэдээлэл хүргэх, санал солилцох уулзалт, хэлэлцүүлгийг зохион байгуулсан.

Өнөөдрийн уулзалтаар бид зөвхөн тэтгэврийн хэмжээний талаар бус, ахмад настны орлогын баталгаа, хөдөлмөр эрхлэлт, нийгмийн даатгалын тогтолцооны шинэчлэл, олон давхаргат тэтгэврийн тогтолцоо, Нийгмийн даатгалын багц хуульд орсон нэмэлт, өөрчлөлтийн талаар мэдээлэл хүргэж, ахмадуудынхаа санал бодлыг тань сонсохыг зорилоо.

Ахмад настны тухай хуулийн 3 дугаар зүйлд эмэгтэй 55, эрэгтэй 60 ба түүнээс дээш настай хүнийг ахмад настан гэж тодорхойлсон байдаг.

- Монгол Улсад 2026 оны статистик мэдээллээр нийт 444.0 мянган ахмад настан байгаагаас 141.5 мянга нь эрэгтэй, 302.5 мянга нь эмэгтэй байна. Өөрөөр хэлбэл, нийт ахмад настны 68.1 хувийг эмэгтэйчүүд эзэлж байна.

- 2024 оны байдлаар Монгол Улсын хүн амын дундаж наслалт 71.8 хүрсэн бөгөөд эрэгтэйчүүдийн дундаж наслалт 67.9, эмэгтэйчүүдийнх 77.1 жил байна. Энэ нь эрэгтэй, эмэгтэй хүмүүсийн дундаж наслалтын зөрүү 9.2 жил байгааг харуулж байна.

- Хүн амын насжилт цаашид улам нэмэгдэх төлөвтэй байна. Үндэсний статистикийн хорооноос гаргасан судалгаагаар 2040 онд ахмад настны тоо 2026 онтой харьцуулахад 1.7 дахин нэмэгдэж 748.7 мянгад, 2050 онд 2.2 дахин буюу 991.5 мянгад хүрэхээр байна.

- Энэ нь ахмад настны нийгмийн хамгаалал, эрүүл мэнд, хөдөлмөр эрхлэлт, орлогын баталгаа, нийгмийн оролцоог хангах бодлогыг урт хугацаанд төлөвлөж, үе шаттай хэрэгжүүлэх шаардлагатайг харуулж байна.