Хөдөлмөр, нийгмийн хамгааллын сайд А.Ариунзаяа Эмэгтэйчүүдийн аж байдлын комиссын 66 дугаар чуулганы Сайд нарын дугуй ширээний уулзалтад оролцов.

Хөдөлмөр, нийгмийн хамгааллын сайд А.Ариунзаяа Эмэгтэйчүүдийн аж байдлын комиссын 66 дугаар чуулганы Сайд нарын дугуй ширээний уулзалтад оролцов.
Хөдөлмөр, нийгмийн хамгааллын сайд А.Ариунзаяа тэргүүтэй төлөөлөгчид энэ оны 3 дугаар сарын 14-26-ны өдрүүдэд Нью-Йорк хотноо холимог хэлбэрээр болж буй Эмэгтэйчүүдийн аж байдлын комиссын 66 дугаар чуулганд оролцож байна.
Сайд А.Ариунзаяа 3 дугаар сарын 15-ны өдөр болсон “Эмэгтэйчүүдийн дуу хоолой: байгаль орчин, уур амьсгалын өөрчлөлт болон гамшгийн эрсдэлийг бууруулах бодлого, хөтөлбөрүүдийн хүрээнд эмэгтэйчүүдийн шийдвэр гаргах түвшин, бүрэн, тэгш оролцоог хангах сайн туршлага” сэдэвт Сайд нарын дугуй ширээний уулзалтад цахимаар оролцлоо.
Тэрбээр Монгол Улс уур амьсгалын өөрчлөлттэй тэмцэх олон улсын холбогдох гэрээ, конвециудад нэгдэн орж, хэрэгжүүлж байгаагийн зэрэгцээ “Байгаль хамгаалах тухай хууль”, “Гамшгаас хамгаалах тухай хууль”, “Алсын хараа-2050” зэрэг бодлого, хууль тогтоомжийг баталсан талаар танилцууллаа. Мөн уур амьсгалын өөрчлөлт, цөлжилттэй тэмцэх, агаарын бохирдлыг бууруулах, гамшгаас урьдчилан сэргийлэх чиглэлд Монгол Улсын Засгийн газраас авч хэрэгжүүлж буй үйл ажиллагааны талаар мэдээлэл өгөв.