"Жендэр ба хөгжил" үндэсний чуулган амжилттай болж өндөрлөлөө

2018-02-01 17:22   Уншсан тоо: 223

       Монгол Улсын Ерөнхий сайдын ивээл дор “Жендер ба хөгжил” үндэсний чуулган Төрийн ордонд өнөөдөр амжилттай болж өндөрлөлөө. Өнөөдрийн чуулганаар жендэрийн талаарх олон улсын чиг хандлага, төрөөс жендэрийн талаар баримталж буй бодлогыг танилцуулах, жендэрийн эрх тэгш байдлыг хангах тухай хууль, үндэсний хөтөлбөрийг сурталчлан таниулах, жендэрийн эрх тэгш байдлыг хангах тухай хууль, үндэсний хөтөлбөрийн хэрэгжилтэд төр, төрийн бус байгууллага, иргэний нийгэм, хэвлэл мэдээллийн байгууллага, хувийн хэвшлийн хамтын ажиллагааг эрчимжүүлэх, салбар, орон нутаг, байгууллагын бодлого, үйл ажиллагаанд жендэрийн үзэл баримтлалыг нэвтрүүлэх, чадавхийг бэхжүүлэх зэрэг асуудлуудыг хэлэлцсэн юм.

         Чуулганы үйл ажиллагаанд Ерөнхий сайд У.Хүрэлсүх, Хөдөлмөр, нийгмийн хамгааллын сайд С.Чинзориг болон холбогдох албаны төлөөллүүд оролцлоо. Мөн 21 аймаг, нийслэлийн 9 дүүрэг, хороод, холбогдох төрийн болон төрийн бус байгууллага, олон улсын байгууллага, эрдэмтэн судлаачид зэрэг нийт 500 гаруй зочид, төлөөлөгчид оролцож жендэртэй холбоотой өөрсдийн санал бодлоо солилцсон юм.

          Монгол Улсын Ерөнхий сайд У.Хүрэлсүх чуулганыг нээж хэлсэн үгэндээ “Жендэрийн тэгш байдлыг хангах нь хүний эрхэд суурилсан хөгжлийн гол зарчим. Засгийн газар хөгжлийн бүхий л бодлого, хөтөлбөртөө жендэрийн үзэл баримтлалыг нэвтрүүлэхийг зорьж байна” гэсэн юм. Тэгвэл Хөдөлмөр, нийгмийн хамгааллын сайд С.Чинзориг "Жендэрийн тэгш байдал нь нэг салбарын дагнан хариуцах хүрээнээс хальж  салбар дундын зохицуулалт, олон талт хамтын ажиллагаа шаардах онцлогтой асуудал гэдгийг бид бүгд мэднэ. Тиймээс уг асуудлыг зохицуулах үүрэг бүхий Жендэрийн үндэсний хороог Монгол Улсын Ерөнхий сайд ахалж, хорооны гишүүдийг төр, төрийн бус байгууллагаас тэнцүү тоогоор бүрдүүлэн ажиллаж байна. Түүнчлэн салбар, орон нутагт жендэрийн асуудал хариуцсан бүтэц, үндэсний хэмжээний сүлжээ бий болгох зорилгоор яамд, аймаг, нийслэл, дүүрэгт 44 жендэрийн салбар зөвлөл, хороодыг байгуулаад байна. Үндэсний хэмжээнд ажиллах анхны жендэрийн сургагч багш нарыг бэлтгэж, Жендэрийн үндэсний хорооны дэргэд мэргэшсэн жендэрийн шинжээчдийн бүлэг, хэвлэл мэдээллийн зөвлөл, жендэр консорциумыг ажиллуулж эхэллээ" гэлээ.

    Ийнхүү “Жендер ба хөгжил” үндэсний чуулганы төгсгөлд нийгмийн салбар бүрт чиглэсэн урилга гаргаснаар өндөрлөлөө.